|
عەقیلی كوڕی ئەبووطالیب(رضي الله عنه)
ناوى عەقیلی كوڕی ئەبووطالیبى كوڕی عەبدمەنافى قوڕەیشی هاشمیە، براى عەلى كوڕی ئەبووطالیبی زاواى پێغەمبەر (صلى الله عليه وسلم) و موژدەپێدراوى بەهەشت و چوارەم خەلیفەى موسڵمانانە، عەقیل تەمەنى لە عەلى زیاتر بوو، عەقیل ئامۆزاى پێغەمبەرى خوا (صلى الله عليه وسلم) بوو، دایكی ناوى فاطيمهى كچی ئەسەدە.[1]
عەقیل لە غەزاى بەدردا لەناو سوپاى بێباوەڕاندا بەشدارى كرد و بەدیل گیرا، هاودەم بەویش عەبباسی مامیشی بەدیل گیرا، جا پێغەمبەر (صلى الله عليه وسلم) بە عەبباسی فەرموو ئەی عەبباس خۆت و عەقیلى برازات و نەوفەلی كوڕی حارث و عوتبەى هاوپەیمانت بە سامان ئازاد بكە، چونكە تۆ سامانت هەیە، ئەویش وایكرد.[2]
ئیبن سەعد دەڵێت عەقیل لە ساڵی هەشتى كۆچیدا كۆچی كرد بۆ مەدینەو موسڵمان بوو وبەشدارى غەزاى موئتەى كرد، دواتر نەخۆش كەوت.[3]
رایەك دەڵێت عەقیل پێش رێككەوتنى حودەیبیە موسڵمان بوو، بەڵام لە ساڵی هەشتەمى كۆچیدا وەفاتى كرد.[4]
رایەكیش دەڵێت عەقیل بە بێباوەڕی مایەوە تا لە فەتحى مەككەدا موسڵمان بوو، دواتر لە غەزاى حونەیندا بەشدارى كرد و لە دەورى پێغەمبەرى خوا (صلى الله عليه وسلم) مایەوە.[5]
جارێك پێغەمبەر (صلى الله عليه وسلم) بە عەقیلی فەرموو (ئەی ئەبوویەزید من دووجار تۆم خۆشدەوێت، خۆشەویستیەك لەبەر نزیكیت-خزمایەتیت-لێم و خۆشەویستیەك لەبەرئەوەى دەزانم مامم چەندە تۆی خۆشدەوێت).[6]
رایەك دەڵێت لە سەردەمى موعاویەی كوڕی ئەبووسوفیاندا وەفاتى كرد، ئیبن حەجەر دەڵێت بە سەنەدى صەحیح هاتووە كە لە سەرەتاى دەسەلآتى یەزیدى كوڕی موعاویەدا وەفاتى كردووە.[7]
[1] - الطبقات الكبرى لابن سعد، ج4، ص 42.
[2] - الطبقات الكبرى لابن سعد، ج4، ص 13-14.
[3] - الطبقات الكبرى لابن سعد، ج4، ص 43.
[4] - أسد الغابة، ج4، ص 70.
[5] - الإصابة في تمييز الصحابة، ج4، ص 532.
[6] - المستدرك على الصحيحين، الرقم 6505، المعجم الكبير للطبراني، الرقم 1435.
[7] - الإصابة في تمييز الصحابة، ج4، ص 531.
|